Fréttir

Öll leikhúsgögnin komin á borð Lilju sem leggst undir feld

Mynd: Vísir/Egill

Mennta- og menningarmálaráðherra ætlar að taka viðtöl við umsækjendur og í framhaldinu skipa Þjóðleikhússtjóra til næstu fimm ára. Þjóðleikhúsráð, Capacent og valnefnd hafa lokið störfum í málinu og skilað gögnum til ráðherra. Lilja Alfreðsdóttir segir í samtali við Vísi að valnefndin hafi lokið verkum sínum í gærkvöldi.

„Nú fer ég að leggjast undir feld,“ segir Lilja.

Ráðherra segist ætla að leggjast yfir næstu skref í málinu, þar með talið að taka viðtöl við umsækjendur, og gerir ráð fyrir að sú vinna fari fram í næstu viku.

Lilja mælti fyrir frumvarpi sínu um sviðslistir á Alþingi í dag þar sem meðal annars er sett hámark á tíu ár í starfi Þjóðleikhússtjóra.

Sjö um hituna

Sjö umsækjendur voru um starf Þjóðleikhússtjóra sem auglýst var laust til umsóknar þann 1. maí en umsóknarfrestur var til 1. júlí.

Ari Matthíasson hefur gegnt starfinu undanfarin tæp fimm ár og sækist eftir endurráðningu. Kristín Eysteinsdóttir Borgarleikhússtjóri og Magnús Geir Þórðarson útvarpsstjóri eru sömuleiðis meðal umsækjenda. Aðrir umsækjendur eru Brynhildur Guðjónsdóttir leikari og leikstjóri, Guðbjörg Gústafsdóttir og Stefán Sturla Sigurjónsson verkefnastjóri, leikari og rithöfundur.

Leikhúsheimurinn býður spenntur eftir ákvörðun Lilju sem er á engan hátt bundin af niðurstöðu valnefndar, Þjóðleikhúsráðs og Capacent.VÍSIR/VILHELM

Lilja upplýsir að Þjóðleikhúsráð hafi gripið fyrsta boltann og fengið ráðgjafa frá Capacent til liðs við sig. Samkvæmt upplýsingum Vísis fóru umsækjendur fyrst í viðtal hjá ráðgjafa Capacent og Halldóri Guðmundssyni, formanni Þjóðleikhúsráðs.

Í framhaldinu voru umsækjendur boðaðir á fund Capacent og spurðir frekar út úr. Þjóðleikhúsráð skilaði af sér og í framhaldinu var skipuð þriggja manna valnefnd í mennta- og menningarmálaráðuneytinu.

Þriggja manna valnefnd

Samkvæmt heimildum Vísis skipuðu valnefndina Auður B. Árnadóttir og Stefán Baldursson, skrifstofustjórar í mennta- og menningarmálaráðuneytinu, og Jóna Finnsdóttir, fyrrverandi framkvæmdastjóri Listaháskóla Íslands.

Valnefndin lauk sem fyrr segir störfum í gærkvöldi og er boltinn nú hjá menntamálaráðherra.

Ari Matthíasson Þjóðleikhússtjóri hefur áhuga á að stýra leikhúsinu áfram næstu fimm árin.VÍSIR/EGILL

Mikil spenna ríkir fyrir skipuninni og hafa alls kyns kenningar verið á lofti um hver niðurstaðan verði. Þá hafa þrír umsækjendur sem taldir eru líklegir til að fá starfið verið í eldlínunni undanfarna mánuði í ólíkum málum þó.

Standa í ströngu

Birna Hafstein, formaður Félags íslenska leikara, hefur kvartað undan framgöngu Ara í starfi Þjóðleikhússtjóra. Hann hefur svarað þeim ásökunum og segir Birnu hafa farið um með ósannindi um sig, sína persónu og starfsemi leikhússins.

Ríkisendurskoðun hefur séð ástæðu til þess að gera stjórnsýsluúttekt á Ríkisútvarpinu hvar Magnús Geir er útvarpsstjóri. Ríkisendurskoðandi hefur sagt ýmsar ástæður fyrir því að könnuð sé fjárhagsstaða stofnunarinar, hagkvæmni og skilvirkni umfram það sem hefðbundin fjárhagsendurskoðun leiði í ljós.

Þá stendur Kristín Eysteinsdóttir Borgarleikhússtjóri í ströngu fyrir dómstólum þar sem vænta má dóms á næstu dögum í máli Atla Rafns Sigurðssonar leikara. Honum var sagt upp störfum í Borgarleikhúsinu, ómaklega að eigin sögn, og hefur krafist skaðabóta.

Grein frá Vísi.

- -

Upp