Fréttir

Lifun eftir Jón Atla Jónasson hlaut verðlaun á Prix Europa

Mynd: Lifun (ruv.is)

Uppsetning Útvarpsleikhússins á framhaldsleikritinu Lifun eftir Jón Atla Jónasson hlaut þann 20. október þriðju verðlaun í flokki leikinna framhaldsverka fyrir útvarps á ljósvakahátíðinni Prix Europa sem er ein virtasta verðlaunahátíð á sviði fjölmiðlunar í Evrópu.

Þetta er í þriðja sinn sem verk Útvarpsleikhússins hlýtur þriðja sæti á hátíðinni og í annað skipti sem verk sem verk eftir Jón Atla hlýtur þann heiður, en verk hans Djúpið var í þriðja sæti árið 2011.

Lifun fjallar um alræmdasta sakamál Íslandssögunnar; rannsóknina á hvarfi Guðmundar og Geirfinns Einarssona. Í verkinu er upptökum, flestum frá þeim tíma er rannsókn málsins fór fram og viðtölum við þá sem tengdust málinu, blandað saman við leiktexta. Má því segja að um sé að ræða leikverk með heimildum um rannsókn sakamálsins og einblínir að miklu leyti á gæsluvarðhaldsvist sakborninga í málinu. Komið er inn á harðræði í Síðumúlafangelsinu, áhrif einangrunarvistar og samskiptaleysi milli sakborninga og verjenda í málinu sem er fáheyrt í vestrænum lýðræðisríkjum. Lifun hlaut Grímuna í flokki útvarpsverka fyrr á þessu ári.

(Frétt af vef útvarpsleikhúsins eftir Þorgerði E. Sigurðardóttur)

- -

Upp