Borgarleikhúsið

Gleðileikur um depurð

Allt sem er frábært í leikstjórn Ólafs Egils Egilssonar er frumsýnd í kvöld. Verkið er eftir Duncan Macmillan en fastagestir í Borgarleikhúsinu ættu að þekkja önnur verk leikskáldsins því hann skrifaði Fólk staði hluti og gerði leikgerðina að 1984 sem bæði voru frumsýnd á síðasta leikári.

Valur Freyr Einarsson er eini leikarinn í sýningunni en til þess að segja söguna leitar hann til áhorfenda til að leika nokkur lítil hlutverk sem á vegi aðalpersónunnar verða. Eftirfarandi umfjöllunartexti er fenginn af vef Borgarleikhússins:

„Allt sem er frábært fær fólk til að hlæja þar til það skilur loks hvers vegna það grætur! Hvernig bregst ungur sonur við myrkum hugsunum móður sinnar? Hann býr auðvitað til lista yfir allt sem er frábært í heiminum og gerir lífið þess virði að lifa því: Rjómaís, guli liturinn, kung fu-myndir, vatnsslagur, mega horfa fram eftir á sjónvarpið, fólk að detta, rússíbani … Tuttugu árum síðar er listi unga drengsins í fullu gildi og hefur lengst svo um munar – í ævilanga áminningu um það að gleði er ekki síst að finna í hlutum sem virðast léttvægir.

Valur Freyr Einarsson stendur einn á sviðinu í hlutverki manns sem gerir atlögu að depurðinni og lífsleiðanum, með aðstoð áhorfenda og listann góða að vopni, og segir í leiðinni hrífandi sögu af ást, sorg og ís með dýfu. Höfundur er Duncan Macmillan, sá hinn sami og skrifaði verkin Andaðu og Fólk, staðir og hlutir sem sló í gegn í Borgarleikhúsinu á síðasta leikári. Þetta einfalda en snjalla verk hefur verið sett á svið víða um heim og hlotið gríðarlega góðar viðtökur gagnrýnenda jafnt sem áhorfenda og birtist hér í þýðingu Kristínar Eiríksdóttur.“

 

- -

Upp